نیپال میں عام انتخابات 5 مارچ کو ہوں گے، الیکشن کمیشن نے شیڈول کا اعلان کر دیا
نمائندہ نیپال اردوٹائمز
احمدرضاابن عبدالقادراویسی
کاٹھمانڈو
الیکشن کمیشن نے پیر کو نیپال میں عام انتخابات کے شیڈول کا اعلان کیا۔ عام انتخابات اگلے سال 5 مارچ کو ہوں گے اور ووٹوں کی گنتی 6 مارچ سے شروع ہو گی۔ ووٹوں کی گنتی مکمل ہونے کے بعد حکومت سازی کا عمل شروع ہو جائے گا۔الیکشن کمیشن نے انتخابی شیڈول کا اعلان کرتے ہوئے کہا کہ ووٹنگ 5 مارچ 2026 کو صبح 7 بجے شروع ہوگی اور شام 7 بجے تک جاری رہے گی۔ اس شام تمام بیلٹ بکس جمع کیے جائیں گے، اور ووٹوں کی گنتی اگلی صبح 6 ،مارچ 2026 کو شروع ہوگی۔ الیکشن کمیشن کے مطابق سیاسی جماعتوں کی رجسٹریشن کی آخری تاریخ 17 نومبر سے 26 نومبر تک مقرر کی گئی ہے۔ کمیشن نے واضح کیا ہے کہ جو جماعتیں مقررہ وقت میں رجسٹریشن کرانے میں ناکام رہیں گی وہ انتخابات میں حصہ نہیں لے سکیں گی۔کمیشن کے مطابق امیدواروں کی فہرستیں 2 اور 3 جنوری کو جمع کرانی ہوں گی۔ نیپال کے مخلوط انتخابی نظام میں 165 امیدواروں کا انتخاب براہ راست ووٹنگ کے ذریعے کیا جاتا ہے، جب کہ 110 اراکین کا انتخاب متناسب نظام کے ذریعے کیا جاتا ہے۔ کمیشن نے امیدواروں کی نامزدگیوں کے لیے 14 فروری کی تاریخ مقرر کی ہے۔ اسی طرح انتخابی مہم کا دورانیہ 15 فروری سے 2 مارچ تک ہے۔الیکشن کمیشن نے کہا کہ اس کا مقصد تمام اسٹیک ہولڈرز کے درمیان بروقت تیاریوں اور موثر ہم آہنگی کے ذریعہ آزادانہ، منصفانہ اور شفاف انتخابات کو یقینی بنانا ہے۔ صدر رام چندر پوڈیل نے 12 ستمبر کو ایوان نمائندگان کو تحلیل کر دیا تھااور نئے انتخابات کی تاریخ کا اعلان کیاتھا۔عبوری وزیر اعظم سوشیلا کارکی نے کہا کہ ان کی حکومت وقت پرعام انتخابات کرانے کے لیے پرعزم ہے۔ کارکی، 12 ستمبر کو وزیر اعظم بنیں، جنہوں نے سابق وزیر اعظم کے پی شرما اولی کے خلاف نوجوانوں کی زیر قیادت جنریشن زی اپوزیشن کے پرتشدد مظاہروں کے بعد سیاسی عدم استحکام کا خاتمہ کیا۔کے پی شرما اولی کی حکومت کرپشن اور سوشل میڈیا پر پابندی کی وجہ سے ہٹائی گئی
