کا ٹھمانڈو میں مظاہرہ کے دوران ہلاکتوں کی تعداد 19 ہوگئی، 500 سے زائد زخمی

 نمائندہ نیپال اردوٹائمز احمدرضاابن عبدالقادراویسی 

کاٹھمانڈو پیر کو سوشل میڈیا پر پابندی کے خلاف احتجاج کے دوران پولیس کی فائرنگ سے 19 افراد کے ہلاک ہونے کی اطلاع ہے۔ ہزاروں نوجوان لڑکے اور لڑکیاں سڑکوں پر نکل آئے ہیں۔ مظاہرین پارلیمنٹ کے احاطے میں گھس گئے۔ یہ دیکھ کر پولیس نے آنسو گیس کے گولے داغے اور پانی کا چھڑکاؤ کیا۔ کاٹھمانڈو انتظامیہ نے توڑ پھوڑ کرنے والے کو دیکھتے ہی گولی مارنے کا حکم دیا ہے۔ حکومت کی جانب سے فیس بک، ٹویٹر، واٹس ایپ اور یوٹیوب جیسے 26 سوشل میڈیا اکاؤنٹس پر پابندی سے ناراض نوجوانوں نے 8 ستمبر سے جن جی انقلاب کے نام سے احتجاج شروع کر دیا ہے۔نوجوانوں نے وزیر اعظم کے پی شرما اولی کی حکومت کے خلاف نعرے لگائے اور پارلیمنٹ میں گھس گئے۔ اس کے بعد کاٹھمانڈو میں انٹرنیٹ بند کر دیا گیا اور کرفیو لگا دیا گیا۔ وزارت صحت و آبادی کے ذرائع کے مطابق جاری احتجاج کو روکنے کے لیے پولیس نے آنسو گیس کے گولے داغے اور فائرنگ کی جس کے باعث ہلاکتوں کی تعداد 19 ہوگئی۔اسپتال انتظامیہ کے سربراہ نارائن دہال نے بتایا کہ 100 سے زائد زخمیوں کو مختلف اسپتالوں میں داخل کرایا گیا ہے۔ ٹراما سینٹر میں چھ سول سروس اسپتال میں تین کے ایم سی اسپتال میں ایک تریبون یونیورسٹی ٹیچنگ اسپتال میں ایک اور ایورسٹ اسپتال میں تین افراد کی موت ہوئی۔ زخمیوں کی اصل تعداد 500 سے زیادہ ہے۔ یہ تحریک مسلسل پرتشدد ہوتی جا رہی ہے۔ دمک میں پولیس کی فائرنگ سے متعدد مظاہرین زخمی ہو گئے ہیں۔ زخمیوں کو ہسپتال لے جایا گیا ہے۔مظاہرین اور سیکورٹی فورسز کے درمیان پرتشدد جھڑپیں ہوئیں۔ مظاہرین رکاوٹیں توڑ کر آگے بڑھنے کی کوشش کر رہے ہیں۔ مظاہرین نے پارلیمنٹ کی عمارت کے گیٹ نمبر 2 کے قریب آگ لگا دی ہے اور آگ کے شعلے تیزی سے بڑھ رہے ہیں۔ آگ ابھی تک نہیں بجھی۔ کاٹھمانڈو میں مظاہرے کے پرتشدد ہونے کے بعد نیپالی فوج کو تعینات کرنے کے احکامات دیے گئے ہیں۔ نیپال کی حکومت نے موجودہ صورتحال کا جائزہ لینے کے لیے ایک ہنگامی سیکورٹی میٹنگ بلائی ہے۔ پولیس نے کاٹھمانڈو میں رات 10 بجے تک کرفیو نافذ کر دیا ہے