سہلاؤشریف میں عظیم الشان سالانہ جلسۂ عید میلادالنبی ﷺ بحسن وخوبی اختتام پزیر

 نعرۂ تکبیر ورسالت اورمرحبا:یا مصطفیٰ ﷺ کے نعروں سے گونج اٹھا پورا علاقۂ تھار

 مرکزی جلوس محمدی گاگریا وعلاقۂ گپن سے سہلاؤ شریف تک شان و شوکت سے نکلا 

باڑمیر/

راجستھان(پریس ریلیز)

 سالہائے گذشتہ کی طرح امسال بھی حضور نبی رحمت ﷺ کی یوم ولادت باسعادت بہت ہی دھوم دھام، شان وشوکت اور عقیدت واحترام کے ساتھ منایا گیا۔ یوں تو ماہ ربیع النور شریف کا چاند نظر آتے ہی عاشقانِ رسول ﷺ اپنے دکان، مکان، گلی اور چوراہوں بالخصوص مساجد و مدارس اور درگاہوں کو رنگ برنگے جھنڈوں، برقی قمقموں اور روشنیوں سے سجا کر پرکشش بنادیتے ہیں، مگر ربیع النور کی بارہویں شب و روز کے مناظر تو کچھ اور ہی دلکش و دیدہ زیب نظر آتے ہیں۔ بارہویں شب میں عموماً مسلم آبادیوں میں جلسۂ عید میلادالنبی ﷺ شایانِ شان طریقے پر منعقد کیا جاتا ہے، جب کہ 12 ربیع النور شریف کو جلوس عید میلادالنبی ﷺ نکالنے کا باقاعدہ انتظام کیا جاتا ہے۔ جلسۂ عید میلادالنبی ﷺ میں علمائے کرام سیرتِ رسول ﷺ کے مختلف گوشوں پر روشنی ڈالتے ہیں، جب کہ جلوس عید میلادالنبی ﷺ میں نعرہائے تکبیر و رسالت، آقا کی آمد مرحبا، مرحبا یا مصطفیٰ جیسے نعروں اور صلوٰة و سلام سے گلی محلے اور راستے گونج اٹھتے ہیں۔ 

چنانچہ علاقۂ تھار کے اکثر گاؤں و قصبات جیسے سیڑوا، ہرپالیہ، بامنور، سینہار، تالسر، کونرا، ایٹادا، میٹھے کاتلا، ابھرے کاپار، دیراسر، میکرن والا، دیتانی، کھڈانی، راناسر، گفن ناڈی، کھاریا راٹھوران، لکھڑیالی، بکڑ، لدہے کاپار، بینڈے کاپار،قبول کی ڈھانی، ہینڈیا، آساڑی سندھیان، آگاسڑی، انروڑ، آچارانیوں کی ڈھانی، سولنکیا وغیرہ کے مسلمانوں نے جلسہ و جلوس عیدمیلادالنبی ﷺ کا اہتمام کیا۔ مگر مرکزی جلوس گاگریا و علاقۂ گپن سے سہلاؤ شریف تک نکالا گیا، جن میں ہزاروں فرزندانِ توحید نے شرکت کی۔

 یہ دونوں مرکزی جلوس [جن میں علاقہ کھاوڑ کے مختلف جلوس راستے میں ضم ہوجاتے ہیں] علاقۂ تھار کی مرکزی دینی درسگاہ دارالعلوم انوار مصطفیٰ، درگاہ حضرت پیر سید حاجی عالی شاہ بخاری، پچھمائی نگر سہلاؤ شریف پہنچے۔ وہاں دارالعلوم و درگاہ شریف کی انتظامیہ کمیٹی بالخصوص نورالعلماء پیر طریقت حضرت علامہ الحاج سید نوراللہ شاہ بخاری مدظلہ العالی، دیگر ساداتِ کرام، دارالعلوم کے اساتذہ و طلبہ اور علاقے کی معزز عوام نے شاندار استقبال کیا۔ 

جلوس کے سبھی شرکاء دارالعلوم پہنچنے کے بعد وادیٔ رحمت و انوار میں منعقدہ جلسۂ عید میلادالنبی ﷺ میں شریک ہوئے۔ جلسے کی شروعات تلاوتِ کلامِ ربانی سے ہوئی، بعدہٗ بارگاہِ رسالت مآب ﷺ میں نعتِ رسول ﷺ پیش کرنے کے لیے ثناخوانِ رسول حضرت حافظ و قاری برکت علی انواری احسنی کو دعوت دی گئی۔ آپ نے حضرت قبلہ سید نوراللہ شاہ بخاری کا سندھی زبان میں لکھا ہوا بہترین نعتیہ کلام پڑھا، جس سے مجمع میں وجد کی کیفیت طاری ہوگئی۔ 

پھر دارالعلوم کے فارغین و وابستگان کی انتہائی متحرک وفعال تنظیم "محبانِ جہانیاں کمیٹی" کی طرف سے جناب حاجی رشیـد علی صاحب کو ان کی،ملکی، ملی و قومی خدمات کا اعتراف کرتے ہوئے "سمّان پتر" پیش کیا گیا۔ بعدہٗ معروف نعت خواں حضرت مولانا قاری محمد جاوید صاحب سکندری برکاتی انواری نے خصوصی نعت خوانی کا شرف حاصل کیا۔ 

اس کے بعد خطیبِ اہلسنت حضرت علامہ سعید اختر صاحب قبلہ بھوجپوری نے خصوصی اور انقلاب آفریں خطاب فرمایا۔ آپ نے سامعین کو سیرتِ طیبہ کے مختلف پہلوؤں بالخصوص حضور ﷺ کی ولادتِ باسعادت کے حالات و واقعات نہایت مؤثر انداز میں بیان کیے، اور سرکار ﷺ کی تعلیمات و پیغامِ عدل و انصاف، بھائی چارگی و اتحاد پر عمل کی تاکید کی۔ آپ نے فرمایا کہ حضور رحمتِ دو عالم ﷺ مسیحائے کائنات بن کر تشریف لائے اور سماج سے ظلم و ستم، بدامنی و بدعنوانی کا خاتمہ فرمایا، زندہ درگور ہوتی بیٹیوں کو نئی زندگی بخشی۔ لہٰذا ہمیں بھی چاہیے کہ ہم حضور ﷺ کی تعلیمات کو عام کرنے اور ان کے مطابق اپنی زندگی گذارنے کی کوشش کریں۔ ساتھ ہی آپ نے اتحادِ بین الاقوام اور وطن سے وفاداری پر زور دیتے ہوئے کہا کہ ہمارا مذہب ہمیں یہ درس دیتا ہے کہ ہم اپنے وطنِ عزیز سے محبت کریں، اور اگر وطن کے تحفظ کے لیے خون دینے کی ضرورت پیش آئے تو مسلمان کبھی پیچھے نہیں ہٹیں گے۔ 

آخر میں دارالعلوم انوار مصطفیٰ سہلاؤ شریف کے مہتمم و شیخ الحدیث نورالعلماء پیر طریقت حضرت علامہ الحاج سید نوراللہ شاہ بخاری نے جملہ ارکان و اساتذۂ دارالعلوم اور انتظامیہ کمیٹی درگاہ حضرت پیر سید حاجی عالی شاہ بخاری کی طرف سے جلسہ و جلوس میں شامل تمام شرکاء خصوصاً غلامانِ بخاری کمیٹی گاگریا [علاقہ: کھاوڑ] و علاقۂ گپن کا شکریہ ادا کیا، جن کے بینر تلے یہ دونوں مرکزی جلوس پُرامن طریقے سے اپنے مقامات سے ہوتے ہوئے درگاہ گراؤنڈ میں بخیر و عافیت پہنچے۔ نظامت کے فرائض طلیق اللسان حضرت مولانا محمد حسین صاحب قادری انواری نے بحسن و خوبی انجام دیے۔ اس جلسہ و جلوس میں سیکڑوں علماء و سادات کرام کے ساتھ ہزاروں عوامِ اہلسنت نے شرکت کرکے آقا ﷺ سے اپنی غلامی کا ثبوت پیش کیا۔ 

صلوٰة و سلام اور نورالعلماء حضرت علامہ الحاج سید نوراللہ شاہ بخاری کی دعا پر یہ جلسۂ عید میلادالنبی ﷺ اختتام پذیر ہوا۔ مذکورہ اطلاع دارالعلوم انوار مصطفیٰ سہلاؤ شریف کے ناظم تعلیمات ادیب شہیر حضرت مولانا محمد شمیم احمد صاحب نوری مصباحی نے پریس ریلیز کے ذریعہ دیا-