وزیرِاعظم کارکی کے معاون کا بدعنوانی کے خلاف حکومتی اقدامات کا عزم
نمائندہ نیپال اردوٹائمز
احمدرضاابن عبدالقادراویسی
کاٹھمانڈو عبوری وزیرِاعظم سشیلا کارکی کے ایک قریبی مشیر نے زور دے کر کہا ہے کہ نگران حکومت بدعنوانی کے خاتمے پر توجہ مرکوز کرے گی، جیسا کہ نیپال کے نوجوانوں کا مطالبہ ہے۔اجے کھنال نے پیر کے روز کاٹھمانڈو میں، این ایچ کے، کو دیے گئے ایک انٹرویو میں یہ بات کہی۔وہ وزیر اعظم سُشیلا کارکی کے چیف ایڈوائزر ہیں، جوسابق وزیرِاعظم کے پی شرما اولی کے استعفے کے بعد عبوری وزیرِاعظم مقرر کی گئی ہیں۔سابق وزیر اعظم کے پی شرما اولی نے اُس سیاسی انتشار کے بعد استعفیٰ دیا تھا جس میں مظاہرین اور سیکیورٹی فورسز کے درمیان جھڑپیں ہوئیں اور 76 افراد ہلاک ہوئے۔بدھ کے روز ان مظاہروں کو شروع ہوئے ایک مہینہ مکمل ہو گیا۔ یہ مظاہرے 8 ستمبر کو شروع ہوئے تھے جن میں زیادہ تر نوجوان شامل تھے۔مظاہرین کا مطالبہ تھا کہ حکومت بدعنوانی کا خاتمہ کرے اور معاشی عدم مساوات کو دور کرے۔اجئےکھنال نے بتایا کہ آئندہ سال مارچ میں ہونے والے عام انتخابات عبوری حکومت کی اولین ترجیح ہیں۔انہوں نے کہا کہ حکومت کے انسدادِ بدعنوانی کے ادارے میں اصلاحات کی جائیں گی اور
سیاست دانوں کے مشکوک غیر قانونی اثاثوں کی تحقیقات آئندہ مہینوں میں کی جائیں گی۔
تاہم کھنال نے خبردار کیا کہ حکومت کے پاس وہ سب کچھ کرنے کے لیے درکار وقت نہیں ہے جو وہ کرنا چاہتی ہے۔اُنہوں نے کہا کہ حکومت یہ طے کرے گی کہ کیا ممکن ہے اور کیا نہیں، اور اس کے ساتھ عبوری وزیرِاعظم سشیلا کارکی نوجوانوں کے ساتھ مکالمہ جاری رکھیں گی تاکہ سیاسی اصلاحات کے لیے بنیاد رکھی جا سکے۔
