علماء فاؤنڈیشن بانکے نیپال کی زیرِ نگرانی ۱۸ مساجد کا مثالی اقدام
سیلاب متاثرین کے لیے ۱ لاکھ ۵۸ ہزار ۲۳۶ روپے وزیراعظم ریلیف فنڈ میں جمع
پریس ریلیز
نیپال اردو ٹائمز
نیپال گنج، بانکے:
رسوا سمیت نیپال کے مختلف علاقوں میں آنے والے سیلاب اور دیگر قدرتی آفات سے متاثرہ شہریوں کی امداد و بحالی کے لیے علماء فاؤنڈیشن بانکے نیپال کی زیرِ نگرانی بانکے کی ۱۸ مساجد سے جمع کی گئی مجموعی رقم ۱ لاکھ ۵۸ ہزار ۲۳۶ روپے وزیراعظم ریلیف فنڈ میں جمع کرائی گئی۔
یہ امدادی رقم بانکے کے چیف ڈسٹرکٹ آفیسر (CDO) اور سابق شہری ترقی کے وزیرِ مملکت محترم محمد استیاق رائی کی موجودگی میں وزیراعظم ریلیف فنڈ میں جمع کرائی گئی۔ اس موقع پر سیلاب و قدرتی آفات سے متاثرہ خاندانوں تک امداد پہنچانے کے مقصد سے مختلف مساجد اور مسلم کمیونٹی کی جانب سے جمع کی گئی رقم کو یکجا کرکے سرکاری امدادی فنڈ میں جمع کیا گیا۔اس امدادی مہم کی نگرانی و قیادت علماء فاؤنڈیشن بانکے نیپال کے
صدر مولانا محمد نصیرالدین انصاری صاحب کی سرپرستی میں کی گئی۔ انہوں نے کہا کہ قدرتی آفات اور مشکل حالات میں انسانیت کی خدمت، سماجی ذمہ داری اور باہمی تعاون کے جذبے کو مزید مضبوط کرنے کی ضرورت ہے۔ انہوں نے اس نیک مقصد میں تعاون کرنے والی تمام مساجد، ائمہ کرام، مسجد انتظامیہ، علمائے کرام اور مخیر حضرات کا تہہ دل سے شکریہ ادا کیا۔
علماء فاؤنڈیشن بانکے نیپال نے مختلف مساجد کے ذریعے جمع ہونے والی امدادی رقم کو شفاف طریقے سے یکجا کرکے وزیراعظم
ریلیف فنڈ میں جمع کرایا، تاکہ سیلاب اور دیگر قدرتی آفات سے متاثرہ شہریوں کی امداد، بچاؤ اور بحالی کے کاموں میں اپنا کردار ادا کیا جا سکے۔
اس موقع پر علماء فاؤنڈیشن بانکے نیپال کے میڈیا انچارج محمد توحید رضا نے کہا کہ مشکل وقت میں متاثرین کی مدد کرنا ہم سب کی مشترکہ انسانی اور سماجی ذمہ داری ہے۔ مختلف مساجد اور عوام کی جانب سے ملنے والا تعاون اس بات کا ثبوت ہے کہ ضرورت کے وقت معاشرہ متحد ہوکر متاثرین کے ساتھ کھڑا ہوسکتا ہے۔ انہوں نے مزید کہا کہ علماء فاؤنڈیشن بانکے نیپال آئندہ بھی انسانی خدمت، سماجی تعاون اور قدرتی آفات سے متاثرہ افراد کی مدد کے لیے اپنی استطاعت کے مطابق مثبت کردار ادا کرتی رہے گی۔ علماء فاؤنڈیشن بانکے نیپال کی اس کاوش کو مذہبی و سماجی اداروں کے درمیان تعاون، شفاف امدادی سرگرمیوں اور انسانی خدمت کی ایک قابلِ تحسین مثال قرار دیا جا رہا ہے۔
