نیپال اور پاکستان کا تعاون اسٹارٹ اَپس اور ٹیکنالوجی کے شعبے میں نئے مواقع پیدا کر سکتا ہے: پاکستانی سفیر
پوکھرا (نیپال): نیپال میں متعین پاکستان کے سفیر محمد عامر خان نے کہا ہے کہ نوجوانوں کا مستقبل اسٹارٹ اَپس، ٹیکنالوجی اور جدت طرازی سے وابستہ ہے۔ اگر نوجوان اپنی نئی سوچ اور تخلیقی صلاحیتوں کو پیشہ ورانہ انداز میں عملی شکل دیں تو اپنے ہی ملک میں روزگار اور کاروبار کے وسیع مواقع پیدا کر سکتے ہیں۔
انہوں نے یہ بات پوکھرا میں منعقدہ اسٹارٹ اَپ سمٹ نیپال 2026 سے خطاب کرتے ہوئے کہی۔ پاکستانی سفیر نے کہا کہ ٹیکنالوجی کی ترقی کے ساتھ کاروبار اور صنعت کاری کے نئے امکانات تیزی سے بڑھ رہے ہیں۔ نوجوانوں کو چاہیے کہ وہ تخلیقی صلاحیتوں، جدید سوچ اور ٹیکنالوجی کے مؤثر استعمال کو اپنی ترجیحات میں شامل کریں۔
محمد عامر خان نے کہا کہ پاکستان کو بھی اسٹارٹ اَپس اور ٹیکنالوجی پر مبنی کاروباری اداروں کے فروغ کا تجربہ حاصل ہے۔ اس لیے نیپال اور پاکستان کے درمیان باہمی تعاون سے کاروباری سرگرمیوں، اختراعات اور صنعت کاری کے فروغ کے لیے نئے مواقع پیدا کیے جا سکتے ہیں۔
انہوں نے مزید کہا کہ آج کے مسابقتی دور میں صرف روایتی سوچ کے ذریعے کاروبار کو آگے بڑھانا ممکن نہیں۔ نوجوان کاروباری افراد اگر جدید ٹیکنالوجی اور تخلیقی تصورات کو مارکیٹ کی ضروریات سے ہم آہنگ کریں تو ان کے لیے ترقی کے بے شمار امکانات موجود ہیں۔
پاکستانی سفیر نے بتایا کہ پاکستان کا سفارت خانہ بھی اس مہم کے ساتھ تعاون کر رہا ہے۔ اسٹارٹ اَپ سمٹ نیپال کا بنیادی مقصد نوجوانوں کو کاروبار اور صنعت کاری کی جانب راغب کرنا اور ان کے لیے نئے کاروباری امکانات کی نشاندہی کرنا ہے۔
نیپال اردو ٹائمز
