تاثر برائے نیپال اردو ٹائمز

عزت مآب پروفیسر رفیع الدین ناصرصاحب قبلہ

 * قومی اعزاز یافتہ معلم اورنگ آباد، مہاراشٹر

محترم و مکرمی *جناب عبدالجبار علیمی*

 چیف ایڈیٹر، نیپال اردو ٹائمز،

 کھٹمنڈو

 آداب و تسلیمات!

 اللہ تعالیٰ کی ذاتِ بابرکات سے امید ہے کہ آپ بمعہ جملہ وابستگان خیریت و عافیت سے ہوں گے۔ آج *نیپال اردو ٹائمز* کا شمارہ اردو اخبارات کے ایک گروپ میں دیکھنے کا اتفاق ہوا، جس سے بے حد خوشی ہوئی۔ بارہ صفحات پر مشتمل اس خوبصورت اور معیاری اردو اخبار کو دیکھ کر دل مسرور ہو گیا۔ نیپال جیسے ملک سے آپ جس خلوص اور لگن کے ساتھ اردو زبان و ادب کی خدمت انجام دے رہے ہیں، وہ واقعی قابلِ تحسین اور لائقِ ستائش ہے۔ اخبار میں خبروں کی بہترین کوریج دیکھنے کو ملی، جس میں مقامی، علاقائی، ملکی اور بین الاقوامی خبروں کو نہایت سلیقے اور جامع انداز میں پیش کیا گیا ہے۔ اداریہ حالاتِ حاضرہ کی عمدہ عکاسی کرتا ہے۔ اسی طرح اصلاحِ معاشرہ سے متعلق منتخب مضامین بھی نہایت مفید اور فکر انگیز ہیں۔ اگرچہ آج کا شمارہ غالباً صحافتی ترتیب یا موضوعاتی انتخاب کے لحاظ سے مخصوص نوعیت کا تھا، تاہم اس میں ادبی مضامین، غزلیں اور نظمیں بھی بہت عمدگی سے شامل کی گئی ہیں۔ اس کے ساتھ مذہبی معلومات اور دیگر عام فہم مضامین بھی شاملِ اشاعت ہیں، جو قارئین کے لیے نہایت مفید ہیں۔

 یہ چونکہ ہمارا دیکھا ہوا یہ پہلا شمارہ ہے، اس لیے امید ہے کہ ہر شمارے میں مختلف موضوعات کا احاطہ کیا جاتا ہوگا۔ یقیناً کسی شمارے میں سائنسی موضوعات بھی شامل کیے جاتے ہوں گے۔ اگر یہ سلسلہ اسی طرح جاری رہا تو اردو زبان و ادب کے فروغ میں آپ کا کردار مزید نمایاں ہوگا۔ بہرحال، ہماری جانب سے اس کامیاب اشاعتی کاوش پر دلی مبارکباد قبول فرمائیں۔ اللہ تعالیٰ آپ کی مساعی کو شرفِ قبولیت عطا فرمائے اور مزید کامیابیاں نصیب کرے۔ نیک تمناؤں کے ساتھ

 *پروفیسر رفیع الدین ناصر*

 قومی اعزاز یافتہ معلم اورنگ آباد، مہاراشٹر

نیپال اردو ٹائمز

محترم و مکرم پروفیسر رفیع الدین ناصر صاحب

 اورنگ آباد، مہاراشٹر 

وعلیکم ورحمتہ اللہ وبرکاتہ

 آپ کا محبت بھرا مکتوب موصول ہوا، جس میں آپ نے نیپال اردو ٹائمز کے حالیہ شمارے کے حوالے سے جس خلوص، شفقت اور حوصلہ افزائی کا اظہار فرمایا، اس پر ہم دل کی گہرائیوں سے آپ کے شکر گزار ہیں۔ یقیناً آپ جیسے صاحبِ علم و دانش کی جانب سے اس نوعیت کے تاثرات ہمارے لیے باعثِ فخر بھی ہیں اور حوصلہ افزائی کا ذریعہ بھی۔ آپ نے اخبار کے مختلف پہلوؤں،خبروں کی جامع کوریج، اداریہ، اصلاحی مضامین اور ادبی مواد،پر جس باریک بینی سے روشنی ڈالی، وہ ہمارے لیے رہنمائی کا درجہ رکھتی ہے۔ ہماری بھرپور کوشش یہی ہے کہ نیپال اردو ٹائمز کو ایک ایسا معیاری پلیٹ فارم بنایا جائے جہاں صحافت کے تقاضوں کے ساتھ ساتھ زبان و ادب، معاشرتی اصلاح، مذہبی آگہی اور سائنسی شعور کو بھی متوازن انداز میں پیش کیا جا سکے۔

 آپ کی قیمتی آراء یقیناً ہمیں اپنے کام کو مزید بہتر بنانے میں مدد دیں گی۔ آپ نے سائنسی موضوعات کی شمولیت کی طرف جو توجہ دلائی ہے، وہ نہایت اہم اور بروقت ہے۔ ان شاء اللہ ہم آئندہ شماروں میں اس پہلو کو مزید نمایاں کرنے کی کوشش کریں گے تاکہ قارئین کو متنوع اور مفید مواد فراہم کیا جا سکے۔ دعا ہے کہ آپ کی سرپرستی اور رہنمائی ہمیں آئندہ بھی حاصل رہے۔ اللہ تعالیٰ آپ کو صحت و عافیت کے ساتھ مزید علمی و ادبی خدمات انجام دینے کی توفیق عطا فرمائے۔ ایک بار پھر آپ کی محبتوں اور دعاؤں کا تہہ دل سے شکریہ۔

 والسلام عبدالجبار علیمی نیپالی

 چیف ایڈیٹر، نیپال اردو ٹائمز کاٹھمانڈو، نیپال