عرب امارات سےدوسرا امدادی طیارہ بھی نیپال پہونچ گیا

 نیپال اردو ٹائمز — 

پریس ریلیز

 کاٹھمانڈو: حالیہ دنوں نیپال میں آنے والے تباہ کن سیلاب نے جس طرح انسانی جان و مال کو متاثر کیا ہے، اس سے پیدا ہونے والے حالات کی سنگینی کو الفاظ میں بیان کرنا مشکل ہے۔ متعدد خاندان مشکلات سے دوچار ہیں اور متاثرہ علاقوں میں فوری امداد اور بحالی کی اشد ضرورت محسوس کی جا رہی ہے۔ ایسے مشکل اور آزمائشی وقت میں خلیجی ممالک کی جانب سے نیپال کے متاثرین کے لیے تعاون اور امدادی سرگرمیاں قابلِ ستائش ہیں۔ بالخصوص متحدہ عرب امارات کی جانب سے بروقت امدادی اقدامات نے اہلِ نیپال کے ساتھ انسانی ہمدردی اور یکجہتی کا قابلِ تحسین مظاہرہ کیا ہے۔ متحدہ عرب امارات اس سے قبل 83 ٹن ہنگامی امدادی سامان نیپال روانہ کر چکا ہے، جس میں سیلاب اور لینڈ سلائیڈنگ سے متاثرہ افراد کی فوری ضروریات کو مدنظر رکھا گیا تھا۔ 

اب موصولہ رپورٹ کے مطابق متحدہ عرب امارات کی جانب سے امدادی سامان سے لدا دوسرا طیارہ بھی نیپال کے لیے روانہ کر دیا گیا ہے۔ امدادی طیارے کی یہ دوسری کھیپ یقیناً ان ہزاروں متاثرہ افراد کے لیے راحت، امید اور حوصلے کا پیغام ہے جو اس وقت قدرتی آفت کے باعث شدید مشکلات کا سامنا کر رہے ہیں۔ نیپال اردو ٹائمز سمجھتا ہے کہ قدرتی آفات اور انسانی بحران کے مواقع پر سیاسی، جغرافیائی اور مذہبی اختلافات سے بالاتر ہو کر انسانیت کی خدمت ہی سب سے بڑی ترجیح ہونی چاہیے۔

 مصیبت کی گھڑی میں کسی متاثرہ انسان کے کام آنا محض امداد نہیں بلکہ انسانیت کے عظیم جذبے کا عملی اظہار ہے۔ متحدہ عرب امارات کی جانب سے مسلسل امدادی تعاون اس بات کا ثبوت ہے کہ مشکل وقت میں حقیقی دوستی وہی ہوتی ہے جو الفاظ کے بجائے عملی اقدامات کے ذریعے نظر آئے۔ نیپال کے عوام اس انسانی تعاون کو یقیناً قدر کی نگاہ سے دیکھتے ہیں۔ نیپال اردو ٹائمز متحدہ عرب امارات کی اس انسانی کاوش کو سراہتے ہوئے امید کرتا ہے کہ دیگر ممالک اور عالمی ادارے بھی نیپال کے متاثرین کی مدد اور بحالی کے لیے آگے آئیں گے، تاکہ قدرتی آفت سے متاثرہ خاندان جلد از جلد اپنے معمولاتِ زندگی کی طرف واپس لوٹ سکیں

۔ نیپال اردو ٹائمز پریس ریلیز