بھارت میں نیپالی شہریوں کے لیے بڑی پیش رفت:
مولانا مشہود خاں نیپالی
سفارت خانۂ نیپال نئی دہلی کا مفت قانونی امداد کا جامع پروگرام، انصاف تک رسائی آسان بنانے کا عزم سفارت خانۂ نیپال نئی دہلی نے بھارت میں مقیم نیپالی شہریوں کو درپیش قانونی مشکلات کے حل کے لیے ایک منظم اور جامع پروگرام کا آغاز کیا ہے، جس کے تحت ضرورت مند افراد کو مکمل طور پر مفت قانونی معاونت (پرو بونو سروس) فراہم کی جائے گی۔ اس اقدام کا بنیادی مقصد متاثرہ شہریوں کو بروقت، مؤثر اور باعزت قانونی مدد فراہم کرتے ہوئے انصاف تک ان کی رسائی کو آسان بنانا ہے۔ سفارتخانے کی جانب سے جاری اعلامیے کے مطابق اس مقصد کے لیے بھارت بھر کے اہل اور تجربہ کار وکلاء سے اظہار دلچسپی (EOI) طلب کیا گیا ہے تاکہ ایک قابل اعتماد اور مستند فہرست تیار کی جا سکے۔ اس فہرست میں شامل وکلاء کو ضرورت پڑنے پر متاثرہ نیپالی شہریوں کی قانونی رہنمائی اور عدالتی نمائندگی کے لیے نامزد کیا جائے گا۔ بھارت میں مقیم نیپالی محنت کش، طلبہ اور دیگر شہری اکثر قانونی پیچیدگیوں، زبان کی رکاوٹوں اور مہنگی وکالتی فیس کے باعث مشکلات کا شکار ہو جاتے ہیں۔
ایسے میں بروقت قانونی رہنمائی نہ ملنے کی وجہ سے کئی افراد اپنے حقوق سے محروم رہ جاتے ہیں۔ سفارتخانے کا یہ اقدام اسی خلا کو پر کرنے کی ایک اہم اور مثبت کوشش قرار دیا جا رہا ہے۔ فراہم کی جانے والی خدمات: اس پروگرام کے تحت درج ذیل امور میں قانونی معاونت فراہم کی جائے گی: گرفتاری، حراست، ضمانت اور عدالتی کارروائی میں رہنمائی مزدور تنازعات، اجرت کی عدم ادائیگی اور کام کی جگہ پر استحصال کے معاملات انسانی اسمگلنگ، گھریلو تشدد، دھوکہ دہی اور بدسلوکی کے کیسز دستاویزات کی تیاری، پولیس کارروائی اور عدالت میں مقدمات کے اندراج میں مدد کام کے دوران حادثات یا نقصانات پر معاوضے کے دعووں میں رہنمائی اہلیت کا معیار: درخواست دینے والے وکلاء کا بار کونسل آف انڈیا یا کسی ریاستی بار کونسل میں باقاعدہ رجسٹرڈ ہونا اور بھارتی عدالتوں میں عملی و پیشہ ورانہ تجربہ رکھنا لازمی ہے۔ انسانی حقوق، مزدور قوانین اور سماجی خدمات کے شعبے میں تجربہ رکھنے والے وکلاء کو ترجیح دی جائے گی۔ اس کے ساتھ ہندی، انگریزی یا مقامی زبانوں پر عبور رکھنے والے امیدواروں کو بھی فوقیت حاصل ہوگی۔
درخواست کا طریقہ کار: دلچسپی رکھنے والے وکلاء اپنی تفصیلی سی وی، بار کونسل رجسٹریشن سرٹیفیکیٹ کی کاپی اور تجربے پر مشتمل خط کے ساتھ 15 جون 2026 تک درخواست جمع کرا سکتے ہیں۔ درخواست ای میل consularnepalembassy@gmail.com کے ذریعے یا براہ راست سفارتخانے کے دفتر میں جمع کروائی جا سکتی ہے۔ سفارتخانے کے مطابق یہ تمام خدمات مکمل طور پر بلا معاوضہ ہوں گی، اور اس اقدام کے ذریعے بھارت میں مقیم نیپالی شہریوں کو فوری اور مؤثر قانونی مدد فراہم کر کے ان کے لیے انصاف تک رسائی کو مزید آسان اور مضبوط بنایا جائے گا۔
مولانا مشہود خاں نیپالی
