امریکی ایلچی کو وزیر اعظم نیپال سے ملاقات نہ مل سکی، سفارتی روایت میں غیر معمولی تبدیلی
مولانا مشہود خاں نیپالی
نیپال اردو ٹائمز
لمبنی پردیش
نیپال کے دورے پر موجود امریکی صدر ڈونلڈ ٹرمپ کے جنوبی و وسطی ایشیا کے لیے خصوصی ایلچی سیرجیو گور اور وزیر اعظم بالیندر شاہ کے درمیان متوقع ملاقات نہ ہو سکی، جسے سفارتی روایت میں ایک غیر معمولی پیش رفت قرار دیا جا رہا ہے۔ ذرائع کے مطابق ماضی میں اعلیٰ سطح کے غیر ملکی سفارتکاروں کی وزیر اعظم، وفاقی وزراء اور اہم سیاسی رہنماؤں سے ملاقاتیں ایک معمول کی روایت رہی ہیں، تاہم موجودہ حکومت نے اس روایت سے ہٹ کر مختلف طرز عمل اختیار کیا ہے۔ وزارت خارجہ کے حکام اس وقت تک غیر یقینی صورتحال کا شکار رہے جب تک خصوصی ایلچی کٹھمنڈو نہیں پہنچ گئے، کیونکہ وزیر اعظم کے دفتر کی جانب سے ملاقات کے حوالے سے کوئی واضح پیشگی اطلاع فراہم نہیں کی گئی تھی۔ بعد ازاں وزیر اعظم آفس کی جانب سے جاری وضاحت میں کہا گیا کہ داخلی امور، خصوصاً بہتر حکمرانی اور انتظامی معاملات میں مصروفیت کے باعث یہ ملاقات ممکن نہیں ہو سکی۔ وزیر اعظم کی پریس و تحقیقی مشیر دیپا دہال کے مطابق وزیر اعظم اس وقت اندرونی نظم و نسق کی بہتری پر مکمل توجہ مرکوز کیے ہوئے ہیں۔ سیاسی مبصرین کے مطابق وزیر اعظم بالیندر شاہ حالیہ دنوں میں غیر ملکی سفیروں اور نسبتاً نچلے درجے کے سفارتی حکام سے ملاقاتوں میں احتیاط برت رہے ہیں، جسے بعض حلقے ایک نئی اور محتاط سفارتی حکمت عملی سے تعبیر کر رہے ہیں۔ دوسری جانب امریکی خصوصی ایلچی سیرجیو گور نے اپنے دورۂ نیپال کے دوران وزیر خارجہ اور وزیر خزانہ سے اہم ملاقاتیں کیں، جن میں تجارت، سرمایہ کاری اور دوطرفہ اقتصادی تعاون کے فروغ پر تفصیلی تبادلۂ خیال کیا گیا۔ ذرائع کے مطابق امریکی کمپنیوں نے نیپال میں سرمایہ کاری میں دلچسپی ظاہر کی ہے، تاہم اس کے لیے قانونی اصلاحات اور سازگار کاروباری ماحول کو ضروری قرار دیا گیا ہے۔ یہ امر بھی قابل ذکر ہے کہ اس سے قبل امریکی نائب معاون وزیر خارجہ سمیر پال کپور کے دورۂ نیپال کے دوران بھی وزیر اعظم سے ملاقات نہیں ہو سکی تھی، جس سے یہ تاثر مزید مضبوط ہوتا جا رہا ہے کہ حکومت اپنی سفارتی ترجیحات کو ازسر نو ترتیب دے رہی ہے۔ امریکی خصوصی ایلچی اپنا دورہ مکمل کرنے کے بعد ہفتہ کے روز نئی دہلی روانہ ہو جائیں گے، جہاں وہ اپنی سفارتی ذمہ داریاں جاری رکھیں گے۔مولانا مشہود خاں نیپالی
